Eul' décret anti toubac in France
I-est pour nous achteure! ch'décret anti toubac
!
Revue
d'actualité française le 3 janvier 2008 par Roberte
sur R.Q.C. 95 FM
Vlà qu'in y arriff' aussi à partir du 1er janvi 2008 eul décret anti toubac va s"applitchi pou tertouss in France : interdiction ed' feumer nur var !!!!!
ch'est à dire dins les bars, les bistrots, les boîtes ed' nut, les bar-toubac et les cafés chichas pou les ceusses qui aim'tent feumer aveuc un narguilé.
Vous savez, ou bin j'vous l'apprinds, un narguilé ch'est in.ne pipe à eau rimplie ed'toubac aromatisé aux fruts ou bin aux fleurs; infin tout comme in dit inteur nous cha arsonne à un salon
ed'thé, dins l'même ambiance, ach qui paraît ch'est sensas!!! Les patrons I's vont devoir serrer leus boutiques parce que l'ambiance n'y s'ra pus énon ! et cha f'ra des
chômeus in puque .
I -ara des contrôles mais nous z'autes in nous laiche passer eul réveillon pou finir not' patchet ed' clopes !!!
In n'feumot d'jà pus dins les restaurants, mais cha n'étot pos trop grafe, inter les plats in veyot les feumeus fintchi au déhors.
J'sais qui a in.ne réaction ed' certains bistroquets et restos qui pinss'tent installer des piches espéciales pou feumeus " invertébrés" ( j'pinse que cha s'dit comme cha) mais cha coûte
tchir !!!
Cha m'rappelle l'histoire d'in.ne copine qui avot treuvé un nouviel amoureux :
" -
Alorss I-est bin tin bon ami ??...- Ah ouais, ch'est seur ! I-m'arfusse rin !
- Ah ! et t'es bin logée ? - Eh bé te verros cha, je n'peux nin mi ! - ch'est kmint ? - Ch'est grand et I-n'd'a des piches! ....- Ch'est si grand qu'cha ? - Bin seur, I-a même
in.ne salle pou faire la gueule....- In.ne salle pou faire la gueule ????
Oh li, ....I-appelle cha un boudoir.
Ach qui paraît, I-ya in bar à Lille qui a t'nu 10 mos sans feumeus et s'boutique a dù freurmer ses portes....
Et les pauf's buralistes vont devoir artirer leu inseingn' " eul civette "et cachi un aut' ouvrache car I n'ara pus ed'clients pou l'toubac !
Alors pou vous consoler j'vas y aller de m'pétite tchanchon :
Eul complainte du toubac perdu
( sur
un air de java )
Eul' pétit noir d'vant l'comptoir mais pos sans la clope,
Dins l'bistrot j'venos m'asseoir, je m'sintos au top
Des garlouzettes que l'patron Nénésse gobot sans histoires
D'z'actualités in feumant à l'aisse d'vant l'bon jus à boire.
Et dins l'feumée mes cops d'tchoeur et les bleus d'la vie,
Passot'tent mi, tcheu bonheur aveuc in bon d'mi,
Que j'lampos, in goûtant eul' saveur, m'sintant rinvitchi
Dins l'feumée bleue de cheulle cigarette qu'in dot oblii !!!
Roberte à R.Q.C. 95 FM tous les jeudis de 11 heures à
midi
émission " ed' bouque à orelle " persintée pa: Anne
Marie