L'mauviard

Mi, j'aime acouter l'mauviard
Timpe au matin, jomais artard
I-m'dit :" Léfe te, l'solé I lut,
J'espère que t'as fait in.ne bonne nut ."
Tin v'là qu' justemint  ch'matin,
Alors que dins l'lit j'sus fin bin,
l'mauviard, I-est tout in joie,
Dins l'chériji, I fait sin choix.
Tous l'z'ans, dins m'n'arpe,ch'est l'même histoire,
l'premi, ch'est li , vous pouvez m'croire,
I -s'y connot. Dès qu"eulles sont meures
I les prind toutes aveuc bonheur.
Ses chifflott'mints m'annonc'tent...., j'inrache!
Que ch'futé I-est déjà dins l'plache.
"-Te peux n'd'ête seur, elles sont fin bonnes,
Alors j'n'in laich'rai pou personne! "
J'ai biau m'lever et ratcheurir,
Pousser des cris pou l'faire partir,
Tous l'z'ans, aux ch'rijes, j'leu dis arvoir!

Dins min gardin, I fait 'cor noir,
Ricanant sur un air fort joyeux, I -m'arwette,
D'sus m'n'arpe, laichant au bout des tcheues....., les pirettes!!!
Malgré tout cha, j'pinse que vous allez in rire,
Mi, j'aime acouter ch'mauviard
Car ch'est un fameux gaillard
Chifflant, hureux, timpe au matin,
Mingeant les ch'rijes de min gardin .

Roberte
( 1er prix de poèsie Picarde à Lys-lez-Lannoy en 2004 )

lexique
le mauviard : c'est un merle
Timpe au matin : tôt le matin
I-m'arwette : il me regarde
des pirettes: des noyaux