Ach'teure les Belges I-feum'tent pus

Revue d’actualité Belge et Française RQC95 FM  le 8 Janvier 2007 par Roberte

In n’feume pus dins les restaurants Belges l’jornal vous l’dit : «  Plus de Camel avec le Cécémel, plus de gauloise avec la Cervoise, ni même un verre d’eau avec in.ne Marlboro » dixit le journaliste.

 In 2007 les Belges n’feum’ront pus in mingeant ,….inter les plats bin seur et j’peux vous dire que cha les fait fintchi !!! et cha va aussi arriver in France qui est ach’ qui paraît l’pays de l’liberté !!!!!! ah ! ah ! ah !!!

Ch’est vrai que l’feumée dérinche les ceusses qui’n’feum’tent pos surtout in mingeant et pou eusses ch’est in.ne bonne nouvielle mais pou l’z’autes ch’est in.ne punition , in plaiji in moinsse.Mais ch’est pou l’bin de tertous et  ch’est présinté ainsin. In va devoir s’résigner si in veut ête moins malate ... Conclusion :

-         Les feumeux vont économiser in.ne cigarette ou deux et les non feumeux vont mieux respirer in mingeant . Mais «  l’ma d’un aute I n’guéri nin’l’sin énon » alors !!!! cha va ête dur, dur !!!mais ch’est pou l’bin ed’tertous !!!

-         Et j’me posse des questions :

P’t’ête que ch’est à cause des problèmes dins les seum’tires  qu’in s’intéresse davantache à nous warder in vie?

In brûle ed pus in puque (in dit incinérer) au crématorium pou gaingni de l’plache et j’ai appris que les ossuaires duch’ qu’in met les oches tchand qu’in déterre I- sont pleins alorss… in a pinsé à brûler chés oches  pou faire ainsin in indrot libre pour les ceusses qui arrif’tent !!!

Mais tout cha cha va coûter tchir alorss euj’ proposs’ d’acater des p’tits pots ginre pot à sel avec couvercle ( des salires) pour y mett’ les chintes des ossuaires et les vinte aux gins vivants . Cha pourrot servir d’assaisonn’mint non ? et l’Ville eulle rintrerot dins ses frais !!!

Mais mi, ed’ toute fachon, j’veux pos qu’in m’brûle ni même m’flantchi déhors d’un ossuaire pour êt’brûlée, j’sus d’accord aveuc eul’z’ Egyptiens qu’in wardot dins des « sarcotphaches » et j’ai lu dins l’jornal qu’in a artreuver  l’Evêque  Bauduin Ier, Evêque de Noyon-Tournai de 1044 à 1068. I-est toudis là, in inti d’puque 1038 ans, ouais, d’zous l’Cathédrale ed’ Tournai . 

 « Tu es poussire et t’artourn’ras in poussire !!!…Nin li ! ….I est acore là tout biau comme in.ne momie. Sans obéir aux Ecritures !!!

Ch’est cha que j’veux pour mi .

Alors j’vas faire in.ne demante…

 puisqu’in va l’tchangi ed’ plache, j’veux printe l’ sinne .

 D’vu que m’vissé famille vivot dins le quarti Saint Brice,  J’ai drot !!!

Comme cha je n’s’rai pos déringée pou l’Eternité …… !